| 睇報紙，話有個重犯喺審訊期間暈咗，Ｄ人延遲將佢送院，佢個知名人代表律師發晒爛咋話要追究到底。都唔知Ｄ係咩律師，Ｄ人渣謀財害命，殺人放火，又逃獄，又傷害Ｄ懲教職員，仲有咩好審？拉去斬首好過。以前有逃獄前科，Ｄ人梗係唔會輕易送佢去醫院啦，我覺得正確過正確。宜家Ｄ法例咁鬼鬆，Ｄ重犯居然攤喺擔架瞓著咗，要幾廿人抬住佢去審，個勢都輸晒。
世風日下，唔怪得喺學校Ｄ靚仔唔聽老師話。 |
| |
| 
今日毒菌陪我承受幾許嘲笑！較率直嘅人會微笑／大笑／狂笑，生性謹慎嘅就陰陰咀偷笑！咁又係好攪鬼嘅，一套返工衫襯對張口狂笑嘅毒菌拖鞋！但今朝我隻腳塞唔落對鞋度，唯有硬住頭皮著住佢返學！
好事：經過今日我EQ又高咗！
慘事：星期六日冇得行街街！
|
| |
| 今日放工，本來會好平安咁返歸，因為阿姐煮好飯，但小龜話：「我想同羊羊去飲杯嘢呀！」咁心太軟嘅小羊就邀請小龜去羊欄度玩一陣，泊好車就一齊行，沿途諗住經街市，諗住買Ｄ花花返歸擺，點知年代久遠，間花店已經執咗笠，咁就算啦，行咗幾步，我隻右腳忽然「拗柴」，原來係踩倒一條蔥！好彩阿龜扶我返去。
好消息：上次用剩嗰Ｄ藥膏派得上用場。
壞消息：我又試bite咗！ |
| |
| 天氣涼涼地，最容易跌入「賴床」呢個陷阱，今朝唔小心㩒熄個鬧鐘瞓到6:53！喺17分鐘內洗面擦牙換衫執袋落到樓下，好彩冇遲到。
今日未停過，放工散晒。
聽日派卷，Ｄ細路一般都考得麻麻，唔知點收科。 |
| |
| 我係魔鬼羊，有兩個天使朋友
今日監咗成朝堂，悶到幾乎嘔泡。一路監時順便睇吓份卷﹣中文閱讀理解，嘩！都幾難，好似難過英文，果Ｄ咩完全正確／部份正確／不正確／無從判斷，我都唔識答，好彩唔駛考。
完咗監考，又要開會，攪到成一點，完咗本來諗住過隔離買豬扒飯食，連八達通都拎好準備行過去，就係電光石火之間，忽然心念一動，只係半秒時間，諗到聽日下晝要上個英文進修堂，之後又要再進入冇啖好食嘅循環，又突然想念我心愛嘅蛋黃麻蓉飽，就同阿龜講：「不如去飲茶啦，我好掛住Ｄ麻蓉飽！」再跟住問埋魚媽媽，佢第二反應係：「你係魔鬼！我啱啱執好Ｄ嘢準備改卷！」但我察覺到佢講呢句嘢之前咀角係偷偷地掛住一個掩藏不住嘅微笑然後火速點頭！喺呢D時候，阿龜又點會放過奚落我嘅機會？佢跟住就問媽媽：「你個女Halloween 有冇Ｄ魔鬼頭飾？俾佢（即係我）戴就啱ga喇！」佢兩個一路話我，一路好快手快腳執嘢準備開餐。
魔鬼同天使嘅分別，就係開聲先同後：「主謀落地獄，同伴上天堂」。
 我最鐘意嘅一幅相﹣【地獄壁】
 花生飽／排骨飯／牛肉波／雪梨糕／海鮮波／义燒飽／春卷．．．你話係咪好難抗拒先？
|
| |
